Boogies Extreme, d’n daag d’r noa.

Met bewonjering en verbazing zit ich veur miene kompjoeter de daag van gister te euverdînke. Bewônjering veur mien medefietsers Ronald, Mies, Jac, Rob, Paul en Marieke want wiej dees minse unne berreg op kinne fietse det is neet veur eederein wèggelagdj. 225 Kilomaeter hebbe wè gefietstj, un berreg etappe in de Tour is vergeliekbaar,  dus det is un geweldjigge prestaasiej. En met verbazing euver meine eige konne, want mich is ut neet gegaeve om good unne berrug op te kinne fietse, toch bèn ich d’r mer 5 kieëre vanaaf gehoove, en auch nog op stökke met un stijgingspercentage van boove de 14 a 15 % of nog mieër. Op dees momente bônkdje mich ut hert zoeë haard in miene borst det ich dacht ut bônkdj d’r mich oet. Ich stopdje dan op de plaats kwaam binne un paar tèlle weer tot röst en kost toen waal omhoeëg. Verbaazing en bewônjering de einigste juuste weurd.

Om 7 oor woore wè in Valkenburg op de Cauberg hoeë det de start waas, om 7 oor 22 zeen Mies Jac, Ronald en ich vertrokke, Rob Paul en Marieke moste nog wat pepeere invölle en nog unne sanitaire stop maake, ze zooje os waal inhaale. Mies, de nestor van ut gezelsjap, lèdje neet good op (wè allemoal  neet), dus we vereeje os al innegang, we ginge de Bemelerberrig aaf mer wè moste hum auch weer op. Rob, Paul en Marieke woore al un hieël inj wiejer wiej wè weer op de route trögk woore. Neet te mîn, ’t waer waas good, de omgeaving waas sjoeën en wè haaje in hoeëg tempo d’r op. ’t Kost neet kepot meindje wè. Noa de ieërste paar beklumminge, ginge wè de grens euver de Ardenne in.  Ronald reej al hieël snel lek dus det waas weer verlèt en zoedoondje hebbe wè Rob, Paul en Mariek auch neet mieër ingehaaldj. Op 80 km haaje wè de ieërste verzörgingspost en weem zeen wè doa stoan tot oos verbaazing, Mien van Sniekers en Toos die haaje veur Rob, Paul, Marieke en auch veur os drînke, eate en neum ’t mer op nog uns extra in d’n autoe gelaaje, det waas un fijn verassing, geweldjig. Mien en Toos danke danke. Rob, Paul en Marieke woore un keteer veur det wè doa kwoome alweer doorgereeje dus van inhaale waas gein spraake mieër. Wiej wè allemoal weer good veurzeen woore zeen wè weer opgestaptj en neet lang doanoa begost ut tegooj, La Roudete……………………………..hiej most ich d’r veur ut ieërst d’r van. Wè begoste aan de beklumming en ich dacht nog “as det ut dit is dan kan ich ut waal hebbe”, mer toen ging ich d’n hook om en ut waas of det ich teege un moor aan reej, de La Roudete haaj gein kompassiej met mich, ich most d’r van. Wiej ich einmoal boove waas haaje Mies en Ronald an Jac al efkes op mich motte wachte, veur heur waas det vervaelendj mer ich vonj ut toch waal fijn, dus miene dank doaveur. Op 120 kilomaeter wiej det ut bloodheit waas en wè weer un aantal beklumminge gedoan haaje woore wè door oos water haer, unne behöllepzaame Waal in de buurt van Trooz/Beaufays heet os toen de bidons gevöldj.  Op 150 kilomaeter waas de 2dje verzörgingspost, en auch hiej woore Mien en Toos weer van de partiej, det deej os werkelijk good. Hiej woort ut water en eate weer aangevöldj en wè weer de fiets op. Mien en Toos zooje os nog unne kieér verzörrege op +/-35km van de finish. Rob, Paul en Marieke woore al un oor ieërder deeze stop gepasseerdj. Vol gooje mood d’r weer aan, neteurlek veuldje wè det wè al 150 kilomaeter in de bein haaje mer diej lèste 75 det woeij niks mieër zègke………………toch?, tot det ich teege de Gulperberg op most, Ronald Mies en Jac ginge op de trappers stoan en dânsdje omhoeég, sjoeën om det van achter oet te zeen, ich ploeterdje en worsteldje tot det ut neet mieër  ging………………………………….. d’rvan(verdomme) ich baaldje wiej unne stekker.  Ich bekwoom mich en op mien eige tempo kwaam ich boove, doanoa nog de Kruusberrug (d’r van), Eyserbosweg (d’r van), de Keutenberrug (d’r van)en as toetje de Cauberg. Ronald kwaam nog uns un inj omlieëg gefietsjt om mich omhoeëg te kaake en toen de Finish euver,…… 17.44 oor.  Ongeluifelijk. geweldjig, fantastisch, grandioos, ich haaj ut veur gein goud wille misse. Wat waas det ein beleafenis, ich heb al d’n hieële daag eine glimlach op mien gezicht. Nogmaals, ich haaj ut veur gein goud wille misse, de tocht, de entourage, dit gezelsjap, de verzörreging  door Mien en Toos, alles boete gewoeën.

Verbazing mer veural bewônjering.

Marien