The day after

Op zonnigmörrige wear ich, zoeas auch in de lèste 14 daag, wakker rôndj un oor of vieëf. Ich weit neet drek hoeë det ich bèn,ich leaf nog un bitje in unne roes. Wat waas det un ontvangst hiej aan ut MFA zègk, ut weurtj d’r mich nog koad van. Dit ging alle verwachtinge te boove. Ich kiek links neave mich en zeen de leefdje van mien leave ligke. Voldoan murmeldj ze nog wat in heure sloap, miljaar wat is ze sjoeën. D’n drang is biej os allebiej bevredigdj om het zoeë mer uns te zègke. De spiere zeen stief en stram, heb gister neet gefietstj, det is neet good. Gistermörrege de spulle en de fiets opgehaaldj aan de blokhut, de meiste woore doa, neeme waas oetgeloate. ’t Besef det ut echt veurbiej waas maakdje eederein stil en un bitje trögkgetrokke, alles weurtj opgeruumdj en biejein gezochtj en noa wat ongemèkkelek rondj gehange te hebbe weurtj d’r toch mer besloote om op heivers aan te fietse of te laupe of te rieje.

Gedoan, euver, veurbiej.

Mien gedachte goan trögk noa al die ritte diej wè in de veurbereijinge gefietstj hebbe en de zoaterdige en donderdige en dinsdige en woonsdige etc. etc. mieër as 7500km, dju wat haaj ich doa goojen haard aan.

Eindelijk waas ’t dan zoewiet, zoaterdig 1 september om 9.30 vertrèkke aan de blokhut. Spanning in de pens, neet vol gesloape, d’raan verdomme, we hebbe d’r zin in. Wat un vetrèk, det haaj ich in eeder geval neet verwacht, zoe vol minse det waas fanastisch.

Vanalles vèltj mich weer in, de valpartiej van Daan, de lange daag in de eifel en d’n eine klum noa d’n angere dè daag, de navigaasiejstrubbelinge in ut begin, de verangerendje omgeavinge die’se in d’n autoeë neet zuust mer op de fiets waal.

De Moesel, de Rijn, de hopveldje, berregop berregaaf, sjoen streeke, ut kluune, ut klumme, de col van de boetecategoriej, de röstdaag in Elwangen en Mariazell, ’t good waer, t saame zeen ondanks de versjille in karakter en meining, hieël good gegange.

Mien en Annemie die veur oos zörregdje en alles wasdje en kookdje, masseerdje en deeje inkaupe. Mark en Matti die veur de bagage en bèdjes zörregdje en Mien en Annemie hollepe as det ut nuüdig waas. Ad en Harrie diej as begeleiding op de weeg os lunchpakketje en drînke verzörregdje en veuros oet reeje, wat waas ich bliej det ich heur weer zaag tiedes de etappes.

De techniese ongersteuning van Mies, d’n eine nestor van ut fietsersgezelsjap, wat vertroewe gaaf. Ut leider/veurzittersjap van Wim d’n angere nestor vanut fietsersgezelsjap, good opgeletj en leiding gegeave, perfect gedoan. Paul dè de route hieëlemoal oet heet gewerrektj, Marieke diej de naaviegaasiej veur heur reakening genoome heet, ongeluifelek wat un werrek en wat un gedöldj met os. Bjorn dè neet vol zagt mer regelmoatig biej ein van de beginnelinge bleef en biej deze of gene un handj in de rögk heel. Rob hoeë det ich met bewonjering noa gekeeke heb wiej ich hum omhoeëg zaag fietse, hè kost zich niks fijners veurstelle, zagt d’r mich, dan om aan unne klum van 21 km te beginne en dan lekker lichdjes omhoeëg peddele. De bespreakinge eedere daag, hoeë gein blaad veur de môndj genoome woort. De ervaare renners diej de minder ervaare mèt omhoeég hollepe met advies of gewoeën door neave ein van os te fietse. Ut klumme van Jac, kearelloeëd wat is dè gegruûdj tiedes dees trip, trouwens wè as beginnelinge allemoal. Nancy, Marty, Daan en auch ich rieje völ gemeakeleker omhoeëg as det wè oeëts haaje dörreve te hoope. Ronald dè noa zoeein zwoar operaasiej dacht det d’r neet mèt kost goan, mer noeëw as ein van d’ieërste boove waas en auch nog met unne noewe fiets. Ut leaze van de reacties in ut gaste book, ’t saame goan oet eate. ‘T kalle euver de kôndj en euver thoeës en euver de wichter en de femieliej. S’mörreges ut ochtendritueel en ut ontbijt, om kwartop acht kloar zeen. Komop, wè goan. De instructies van Wim onger ut fietse of ut roope van auto achter, oplètte gaate, teegeligger en zoeë nog mieër van det alles.

De ontvangst in Esztergom en de etappe doa hear in de rengel en hoeë det ut nog dramatisch mis haaj kinne goan, ut oet eate dè oavendj met de minse diej extra veur os noa Esztegom gekoome zeen en de leede van de scoutinggroep van Esztergom, en later met un aantal mân noa de kroeg in ut dörrep, wat haaje wè toch un plezeer.

En smörres om 8 oor nog ff noa de brögk met Jac, nog un paar fotokes maake, Harrie ziene motor nog aanduwe, de baagaasj in de bus en heivers…………………………………………………………………………………………………………………………………………………………………………………………………….. en dan hieël in de verte, hieël wazig, ut besef, goddomme dit maake wè noeëts mieër mèt.

’t Waas un veurrecht en un ieër om dit saame met uch te mooge doon.

Unne glimlach met toch waal un troan det ut veurbiej is. ’t Is inmiddels 8.14, ich heb met Ingrid aafgesprooke det ich om 10 oor trögk zooj zeen om dan met heur op de mountainbike unne toor goan te maake.

8.15 Komop, wè goan. Ich stap op miene fiets met noew kètting.

Ich glimlach en hoop det wè nog lang saame zulle fietse, as det ut aan mich ligktj koomendje zoaterdig om un oor of ein aan de blokhut. Loatj ff wat weete.

Marien

Geef een reactie

Je e-mailadres wordt niet gepubliceerd. Verplichte velden zijn gemarkeerd met *

*


negen − 8 =

De volgende HTML tags en attributen zijn toegestaan: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>